Ұлттық ЮНЕСКО Клубтарының Федерациясының «Жылды жақсылықпен баста» акциясы

🗓️ 05 ақпан күні Қазақстандық Ұлттық ЮНЕСКО Клубтарының Федерациясының «Жылды жақсылықпен баста» акциясы аясында Өскемен қаласындағы «Қамқор» қарттар үйінде ШҚО Ұлан ауданы ЮНЕСКО Клубының мүшесі — «Балалар музыка мектебі» КМҚК «Қарттар – өмірдің шамшырағы» атты қайырымдылық концерттік бағдарламасын ұсынды.

Концерт барысында мектептің «Ұлан сазы», «Сырлы саз» жетігеншілер ансамбльдері, «Тұмарым-ай» би тобы және «Ұстаздар» вокалдық ансамблі өз өнерлерін жоғары деңгейде паш етті. Әр ұжым арнайы дайындалған көркемдік бағдарламаларын ұсынып, қарттарға арнап жүрекке жылы әсем әндер мен күйлер орындады.

Жас өнерпаздардың шынайы ықыласы мен сахналық мәдениеті көрермендердің көңілінен шығып, кеш ерекше жылылық пен қуанышқа толы болды. Қарттар үйінің тұрғындары өнерлі балаларға ризашылықтарын білдіріп, ақ баталарын берді.

Бұл қайырымдылық шарасы ұрпақтар сабақтастығын нығайтып, үлкенге құрмет пен кішіге ізет көрсетудің жарқын үлгісіне айналды. Осындай игі бастамалар қоғамда мейірімділік пен қамқорлық құндылықтарын дәріптей түседі.